Morbi

મોરબી : ઇન્દ્રપ્રસ્થ સોસાયટીના લોકોએ સ્વબળે રોડ-રસ્તાનું સમારકામ કર્યું

19/08/2019 at 3:39 pm

મોરબી : પાછલા દિવસોના પડેલા ભારે વરસાદને કારણે મોરબીની ઘણી સોસાયટીઓમાં રોડ-રસ્તાની હાલત અત્યંત બિસ્માર થઈ ગઈ હતી. ત્યારે તંત્રની રહેમનજરની રાહમાં બેસી રહેવાને બદલે કંડલા બાયપાસ રોડ સ્થિત એક સોસાયટીના રહીશોએ સ્વબળે રોડ-રસ્તામાં પડેલા ગાબડા પુરીને તંત્રના ગાલે જાણે તમાચો માર્યો હોય એવું પ્રતીત થઈ રહ્યું છે.

તાજેતરમાં પડેલા વરસાદને કારણે કંડલા બાયપાસ પર કામધેનુ પાર્ટી પ્લોટ સામે આવેલી ઇન્દ્રપ્રસ્થ સોસાયટીમાં રોડ-રસ્તાની હાલત કથળી ગઈ હતી. વાહનો તો ઠીક છે ચાલીને જવું પણ મુશ્કેલ બન્યું હતું. ત્યારે સોસાયટીઓનાં સ્થાનિકો દ્વારા માટી, મોરમ અને ઝીણી કપચી પાથરીને માર્ગને અવર-જવર લાયક બનાવ્યો હતો. આ કાર્યમાં સોસાયટીના બાળકોથી લઈ મોટેરાઓએ શ્રમદાન કર્યું હતું. તંત્રની વાટે રહેવા કરતા જાત મહેનત ઝીંદાબાદ રૂપી આ કાર્યમાં 30 જેટલા અબાલ-વૃદ્ધો-યુવાનોએ શ્રમદાન કર્યું હતું.