હળવદમાં માવઠું થતા તૈયાર મગફળી ઉભી બજારે તણાઈ ગઈ !!

ગઈકાલ સાંજથી વાતાવરણમાં આવેલા અચાનક બદલાવ બાદ આજે મોરબી જિલ્લામાં મોરબી અને હળવદ પંથકમાં માવઠું કહેર બનીને વરસ્યું હતું. ખાસ કરીને હાલમાં ખેડૂતોની મગફળી તૈયાર થઈ ગઈ હોય અનેક ખેડૂતોના તૈયાર પાથરા તો કેટલાક ખેડૂતોની તૈયાર મગફળીનો માવઠાએ સોથ બોલાવી દીધો હતો.ખાસ કરીને સિંચાઇની સુવિધા ધરાવતા હળવદ પંથકમાં ધનાળા અને કેદારીયા ગામમા તો માવઠું મુશળધાર વરસતા ચોતરફ પાણી – પાણીની સ્થિતિમાં ખેડૂતો તૈયાર મગફળી ઘરે લાવ્યા હોય ઘરની બહાર પડેલી મગફળી પાણીના પ્રવાહમાં ઉભી બજારે તણાઈ ગઈ હતી અને ખેડૂત પરિવારો પોતાની તૈયાર જણસને વરસાદમાં તણાતી બચાવવા પ્રયાસો કર્યા હતા પરંતુ કુદરતના કોપ સામે કાળા માથાના માનવીના પ્રયાસો ટૂંકા પડ્યા હતા.